لر او بر

لر او بر

هارون رشید شیرزاد

هم قاتل یم هم مقتول یم

زه مظلوم، جبر زما دی

په سینه کی می خښ شوی

دا تیره خنجر زما دی

ړنګ او بنګ سوری پری پریوځی

د اور سوو چینارونو

د غم ویړ ټغر په شانی

لوغړن ګودر زما دی

لکه ټوله کورنۍ یی

چا له تیغه یی ویستلی

پیښور او کابل دواړه

لر زما دی بر زما دی

د دعا لپی لبریزی

د ګناه له کلیمو نه

څومره سپین سپیڅلی ښکاری

دا امام کافر زما دی

د شیرزاد او یار تر منځه

که د ژوند او مرګ تر منځه

یو خوا دار د ښکلو لیچو

بل خوا هسی سر زما دی

کابل، د فبروری ۱۰، ۲۰۱۴

سیاست

سیاست

هارون رشید شیرزاد

که زما حق پایمال شی، سیاست وی

که خپل حق غواړمه ستا نه، خیانت وی

خیر که ټول ملت له څرمه تباه کیږی

خو چی ستا ګټی خوندي، سرسلامت وی

که دا ستا د امامت مقتدیان نه وی

په څلور مذهبه واړه ملامت وی

لا تر اوسه اوزګار نه دی لوټمارۍ نه

ما خو وی چی دا مشران به خجالت وی

راټول شوی د یو بل سره پسخیږی

بیا یی ونډه ولایت یا وزارت وی

د ډیریو عقیده ورباندی راغله

مداریان دی هر عمل یی کرامت وی