تجسس
هارون رشيد شيرزاد
د الاهي د روح زره په کې وه
د آزادۍ که انګيزه په کې وه
مازي كالبوت د خاورى نه وو تخليق
هره ماده يي پاكيزه په كې وه
منم شرر د اور خويونه لري
د سوځيدو اوږده لاسونه لري
د تاريخونو موسمونو غيږه
ډير سوزيدلي درمندونه لري
يو ليونې ورته تر خوا حيرانه
يوه يې هيله د زړګي له پامه
د دې شليدلي ګريوانه تر چاکه
راغورځيدلې تفكر له بامه
دې مړو ايرو ته فکر وړې ناست دى
خپلو اسرو ته فکر وړې ناست دى
د دې وجود او خپل موجود په اړه
څو وسوسو ته فکر وړې ناست دې
لمن وهي ورته ژوندون واخلي
د خپل تقدير پسی لټون واخلي
د اسرافيل ګمان يې وشي په ځان
که قيامت ته پيوستون واخلي
ايره ايره شو خو شرر به نه شي
سم سوزوساز ته برابر به نه شي
بس د يوې لمحې الوت لپاره
وزرونه ولري, اوتر به نه شي
د خاوری بت هسی کالبوت پاتې شو
د غلامۍ اوچت ثبوت پاتې شو
د دې بربنډو شواهدو سره
تکبير يې ولې په سکوت پاتې شو
دا مې د دين په دليلونو کې ورک
د قبيلې په ترکيبونو کې ورک
د نوښتونو تجسس نه لري
دا د دنيا په هوسونو کې ورک
زمونږ نظام په کې زمونږه بتان
سلطان په ژبه دې زمونږه اعلان
د ښپو د لاندې رانه ځمکه اخلي
په سر مو ړنګ رانه زمونږه آسمان
د غلامۍ او احتياجۍ سرونه
بې ولولې او هم بې عشقه زړونه
په تدريجي ډول له منځه ويسي
د ژوند او مرګ تر منځ پراته بريدونه
هغه شرر چې په سوز پوی نه يمه
يا خو بلد په داسې خوی نه يمه
يا بې واکۍ ته مې سجده کړې ده
يا د خپل واک په لاس کې لوی نه يمه
انسان به وې, انسانيت نلرې
خليفه وې خو خلافت نلرې
د خپل قوت له پيژندو عاجزه
په مړو حساب يې حرکت نلرې
No comments:
Post a Comment