ماشومه عقیده
هارون رشید شیرزاد
د زړه څړیکه می بیا د اندیښنو سره یو ځای شوه
بیا اوښکه شوه جانانه د لیمو سره یو ځای شوه
د شګو نه می جوړه کوټنۍ کړه په ساحل کی
خو ورانه شوه لاهو شوه د څپو سره یو ځای شوه
د زړه شونډی می نه وی لا پرانستی شکایت ته
بس مینه می د خپلو اسویلو سره یو ځای شوه
خدای مه که ستا د مینی راز په سترګو کی ټوټی شی
دا اوښکه می ډبره آینو سره یو ځای شوه
د مینی ډک زړګی وړم قهرجنو سترګو خواته
هوسۍ می د خونخوارو ازمرو سره یو ځای شوه
دا نن څنګه شیرزاد ورته حیرانه پاتی شوی
ماشومه عقیده می وسوسو سره یو ځای شوه
د جنوری ۱۸مه، ۲۰۱۳
کارته نو، کابل
No comments:
Post a Comment