هارون رشید شیرزاد
د بنګړو شور په ګودر شي، زما خوښ شي
چې د کلي مازدیګر شي، زما خوښ شي
پټپټونې د نظر راسره پيل کړي
غلچکې یې چې نظر شي، زما خوښ شي
که دا ټول کلې خبر وي خوښ پرې نه یم
همدا یو رانه خبر شي، زما خوښ شي
ښکلې مخ یې د پړوني نیمکښو نه
په ورو ورو که رابهر شي، زما خوښ شي
ټوله شپه یې د لیدو په تمه ویښ ووم
په سهار کې څرک د لمر شي، زما خوښ شي
د شیرذاد سره مې نه لږي خو! کله
چې د مینې انځورګر شي، زما خوښ شي
No comments:
Post a Comment