هارون رشید شیرزاد
لا پيدا نه دې نظير په آينو کې
لټومه خپل تصویر په آينو کې
د لیمو د پریوتو لپاره داسې
بندیوان دې شي ضمیر په آينو کې
د کثرت وړې وړې ټوټې رانغاړم
چې شلیدلې دې ځنځير په آينو کې
د یاداښت دوام یې چا اندازه کړې
بیهوده نیسي بهیر په آينو کې
دا انځور به دې رنګونه را پيدا کړي
که پيدا دې کړو تقدیر په آينو کې
یا زما صورت وجود نه بهر شوې
یا دې نیشته نور تاثیر په آينو کې
دا شیرزاد مې له عیبونو نه غافله
لټوي هسې تکثیر په آينو کې
No comments:
Post a Comment