هارون رشید شیرزاد
د جنګ په تورو د شلیدلو ګریوانونو سوري
راسره پاتې د پریوتو دیوالونو سوري
لا یې ساتلي نیمه خوا ورته د للمو اوښکې
بربنډې دښتې ته ورزي د آسمانونو سوري
ها پورې دښتې ته پناه څو سترناکو وړې
رپيږي بیا د لوپټو د بیرغونو سوري
لکه څوک کیږدي خوا په خوا د دوه یارانو مړي
دې ړنګ ګودر سره د سوو چینارونو سوري
چا رالیږلي وسپنیز بازان زمونږ آسمان ته
خدایزده بیا ووینم د زاڼو کتارونو سوري
یو لیونې ستړې، حیرانه، پریشانه داسې
نیسې شیرزاد ته په خپړو د اورونو سوري
No comments:
Post a Comment