پښتانهء له خوبه پاڅیدهء
هارون رشید شیرذاد
چا راته ویل چی پښتانهء له خوبه پاڅیدهء
شکر خدایه شکر چی ویدهء له خوبه پاڅیدهء
وس نلرم خپله له څو ورځو وږی تږی یم
څه وکړمه خدایه میلمانهء له خوبه پاڅیدهء
هری خواته بس د توری شپی بړستنه ویړه ده
دا په کوم مهال کی می لیمهء له خوبه پاڅیدهء
ماته ښکاریدی لکه شملی د پښتنو پورته
داسی دی د سترګودا باڼه له خوبه پاڅیدهء
بیا به د شینکیو ورشوګانو په لټون وځي
بیا کډی باریږي چی شپانهء له خوبه پاڅیدهء
دلته پښتانهء می په بړستنو ننوتی دي
هلته خو د پوری کلي غلهء له خوبه پاڅیدهء
ماته یی د سترګو نظرونه اهمیت لري
څه به شي شیرذاده که ړاندهء له خوبه پاڅیدهء
۱۶مارچ ۲۰۰۸
اتنز، اوهایو
1 comment:
Der pa Zara pori De....
Post a Comment